Leys størv

Dugni søkir eftir deildarleiðara til verkskúlan/verkstaðirnar á Hjalla.

Endamálið hjá Dugna er at stuðla fólkum í at fáa eitt virkið lív. Sum spírin í búmerki okkara lýsir, so byggja vit okkara arbeiði á, at vit øll hava rætt til at vaksa, blóma og anga við teimum fortreytum, vit nú einaferð hava.

Ígjøgnum arbeiðsfremjandi tiltøk á verkstøðum okkara kunnu fólk brúka Dugna til eina lopfjøl víðari til eitt virkið lív, ella eitt frírúm, har tey kunnu starvast hóskandi til førleikar og orku. Endurnýtsla er eitt av høvuðsamboðunum í okkara arbeiði. Vit arbeiða fyri, at menniskju og lutir fáa ein nýggjan møguleika til at virka.

Málbólkurin hjá Dugna eru fólk við lættari sálarligum, sosialum og/ella kropsligum avbjóðingum.

 

Um starvið
Sum deildarleiðari á Hjalla kemur tú at arbeiða í tøttum samstarvi við starvsfólkini á deildini eins og við leiðslubólkin á Dugna. Samstarvið hevur stóran týdning fyri, at Dugni kann virka eftir eini felags kós og við námsfrøðiligari dygd.

Sum deildarleiðari hevur tú ábyrgd av:

- at arbeiðið á deildini er í samsvar við endamálið hjá Dugna og til einhvørja tíð samsvarar tær mannagongdir, ið eru og verða settar fyri stovnin.
- at fíggjarætlanin fyri deildina er samsvarandi ásettum mannagongdum fyri stovnin.
- at javnvág er millum námsfrøðiligu og vinnuligu uppgávurnar.
- at býta út og leiða dagliga arbeiðið í samráð við starvsfólkini á deildini.
- tvørfakliga samstarvinum bæði innanhýsis og uttanhýsis.
- arbeiðinum við førleikameting og útgreinan av næmingum í arbeiðsbúgving.
- at kveikja og menna eitt gevandi samstarv fyri starvsfólk, næmingar og arbeiðsfólk.
- at skipa fyri, leggja til rættis og leiða starvsfundir á deildini.
- at hava menningarsamrøður við starvsfólkini á deildini og at tryggja trivnaðin á deildini.
- at seta og siga úr starvi starvsfólk í samráð við stjóran.
- at koma við hugskotum til útbúgvingarskeið fyri deildina og at seta neyðug tiltøk í verk til tess at menna arbeiðið. 
- at taka lut í tí dagliga arbeiðinum á deildini.
 

Førleikakrøv
- Tú hevur hjarta fyri fólkum við serligum avbjóðingum og greiðan námsfrøðiligan profil.
- Tú hevur góðan leiðsluførleika og ein greiðan leiðslusamleika.
- Tú ert motiverandi og stuðlandi í tínum leiðsluhátti.
- Tú ert væl skipað/-ur í tínum arbeiði og hevur fíggjarligt hegni, innlit og yvirlit.
- Tú ert virðilig/-ur og lurtandi í tíni leiðslu.
- Tú dugir væl at raðfesta, samskipa, leiða og kveikja til tess at fáa mest møguligt burturúr tilfeinginum á stovninum.
- Tú dugir væl at samskifta bæði á skrift og í talu, bæði við leiðslu, starvsfólk, starvsfelagar og aðrar samstarvspartar.
- Tú sær týdningin av at geva títt ískoyti til samlaða virksemið hjá Dugna.
- Tú sær týdningin av støðugt at menna teg sjálvan og tolir broytingar.
- Tú hevur førleika til viðkomandi telduskipanir.
 

Hevur tú hesar eginleikar, ert tú møguliga tann rætti ella tann rætta til starvið, og vit gleða okkum at fáa umsókn frá tær.

 

Løn og setanartreytir

Starvið er námsfrøðiligt og verður lønt sambært avtalu millum Pedagogfelagið og Fíggjarmálaráðið. Deildarleiðarin hevur tilvísing til stjóran.

 

Umsóknarfreist

Umsóknir við avriti av prógvum og CV skulu vera okkum í hendi í seinasta lagi mánadagin 14. november 2022.
Umsóknir skulu sendast til dugni@dugni.fo 
Nærri kunning um starvið fæst við at ringja til Hedvig Johansdóttir, stjóra, á tel. 292999 gerandisdagar millum kl. 9 og kl. 12.

 
Dugni er ein endurbúgvingarstovnur, hvørs endamál millum annað er at skipa fyri arbeiðsvenjing, endurbúgving og umskúling til fólk, ið hava tørv á hjálp til at fáa tilknýti til arbeiðsmarknaðin. Visjónin hjá Dugna er: “Øll, ið fáa pláss á Dugna, skulu koma í útbúgving og/ella arbeiði”, og fyri at røkka visjónini hevur Dugni trý høvuðsmál: 1.Vit taka støði í tí einstaka 2.Vit viðurkenna ymisleika og 3.Vit styrkja arbeiðsførleikar. Dugni er ein sjálvsognarstovnur undir Almannamálaráðnum, sum er skipaður sambært viðtøkum frá 1. juli 2012. Les meira á www.dugni.fo